بداية التحول !!!!

بسم الله الرحمن الرحيم

اليوم الخميس الموافق 27/8/ 1429هـ

الساعة 2:30 ظهراً بتوقيت الرياض

في البداية أعتذر عن عدم كتابتي في اليومين السابقين وذلك نظراً لإنشغالي

والان نكمل القصة

بعد زيارتي للطبيب الأخير ورفضه بشكل تام أني أعمل أي عملية أصابني حالة يأس وإكتئاب وأنا مشكلتي أني إذا ضاق صدري اصير آكل بشراهة كبيرة جداً ومر وقت طويل وحالة الإكتئاب الي مرت علي كانت مدتها طويله وأنا خلال هذه الفتره زاد أكلي وزاد وزني إلى أنني بدائت الاحظ أثناء نومي يكون ضعيف شيئاً فشيئاً إلى أصبح النفس ينقطع أثناء النوم ولا أقدر أنام لدرجه ني ما اقدر أنام أكثر من ساعتين في اليوم وتعبت تعب شديد بسبب قلة النوم وأيضاً إرتفاع الضغط ونسيت اني اقولكم أني كنت اراجع لدكتر عظام بسبب السمنة لأنه كل يوم طالع فيني مرض مره عرق نساء ومره شد عضلي وكانت فيني بداية خشونه في الركبه .. لكن الدكتور ماشاء الله عليه كان جداً جداً شاطر وكانت علاجه كثير يرحيني .

المهم بعد إنقطاع النفس أثناء نومي وقلت النوم عندي صرت أروح للعمل وأنا تعابن مرهق إلى أن يوم من الأيام شافني المدير وقال تعال ياسمين كول!! وش فيك!! وانا ما أصدق انه في أحد معطيني وجه إلا ودمعتي تهل خخخخ ويسألني ليه وشفيك وأحكيله القصة كلها .... ورد علي بشكل مباشر " أنت صاحي ولامجنون"" تروح بنفسك للتهلكة مسوي علمية ربط للمعدة وتبغى تدبيس أو تحوير وبداء يذ كر لي قصة أناس ماتوا بسبب هذه العمليتين أو إنهم الان في العناية المركزة .

وبداء يعطيني النصايح و كيف أخفف وزني وقام من كرسيه وصار يدور في المكتب ويركض خخخخخخخ يعلمني كيف أمشي وأجري علشان أنحف خخخخخخخ -حتى المدير دوخته معي - وأنا وقتها كنت أبغى أضحك لكن ما كنت أقدر . ... لكن الصارحة كلامه كان مشجع لي وبداية التحول لي لئنه وزني كان وقتها 130 كيلو ووهذا أقصى أحد أقدر أتحمله . وعد ما إنتهى من الركض في مكتبه قال شوف بتسوي الرجيم غصب عنك وقال شوف اليوم تاريخه كذا وفي أعطاني مهله وقال شوف أبي أشوفك نقصت كم كيلو وإلا لي تفاهم معاك ثاني .

وبعد ما أنتهى الدوام رجعت للبيت وجلست افكر في كلامه وقررت أني أبداء بالرجيم في اليوم الثاني .

وفعلاً جاء اليوم الثاني وبديت في الرجيم ورحت للعمل وأنا أوقع الحظور كنت لازم أمر على المدير وأعطيه تقرير عن الرجيم بشكل يومي إلا بيزعل مني وكنت إذا ما رحت له يسأل عني ويقول ليش ما جيت لي اليوم .

المهم أنا بدات في الرجيم بدأت أنقص لكن ما راح أقول لكم كم نقصت إلى بعد أنني أوصل للوزن المطلوب علماً بأن وزني في بداية الرجيم 130 والان وزني ماني قايلكم خخخخخخخخخ

والان أستأنكم وأكمل باقي القصة في وقت لاحق إن شاء الله

الرجوع مرة أخرى للمستشفى ولكن !!!!

بسم الله الرحمن الرحيم

اليوم الإثنين الموافق 24/8/1429هـ

الساعة7:00 مساءاً بتوقيت الرياض
بعد خروجي من المستشفى ومرور شهر تقريباً بداء الجوع يرجع الي إلى أن صرت آكل مثل السابق وأكثر بشكل كبيييييييير جداً ولا كنت افكر بالربط الي أنا سويته ومرت الشهور والسنوات ووزني في إزدياد إلى بديت أعاني من زيادة وزني الكبيرة ورحت لمستشفى ثاني علشاني كنت افكر أني أعمل عملية تحوير المعدة أو التدبيس أخطت موعد وجاء اليوم ودخلت على الدكتور وتكلمنا عن العملية وقال أنا بعطيك موعد ثاني علشان تفكر بالعملية لئن في كلا العمليتين إذا عملتها ما تقدر تتراجع بعدها وفعلا جلست فتره أفكر وسألت ولقيت لها أضرار كثيره ..لئن عملية ربط المعدة راح يقصون جزاء من المعدة ولا تقدر تسترجعها مرة ثانية ، أما التحوير راح يتم الغاء المعدة بشكل نهائي وتحويل الأكل إلى الأمعاء وهنا في مخاطر كثيره منها حدوث إنتفاخ في الأمعاء وتاخذ فيتامينات لفتره طويله والبعض قد يأخذها لبقيت عمره ...... الخ من الأعراض وقد يحدث أيضاً الوفاة بسببها وقد حدث هذا مع أشخاص كثيرين بسبب هذه العملية .

المهم جاء الموعد الثاني ودخلت على دكتور غير الي دخلت عليه قبل وسألني أيش تبغى تعمل قلت عملية تدبيس المعدة لكنه للأسف كان رااافض بشكل نهائي أنه يعمل أي عملية لئنه يقول في خطر على حياتك خصوصا أنك عامل ربط المعدة وأنا ما اقدر أتحمل مسؤوليتك ... وأنا لازال راسي صلب وأحاول فيه لكنه رافض قلت طيب ..طلعت من عنده وأخذت موعد ثالث ويوم جاء وقت الموعد دخلت على دكتور ثالث غير الي دخلت عليهم في في السابق ...وبعد مادخلت على الدكتور جلس يقراء في ملفي و بعدها ناظر فيني وقال - وش تبغى - يعني أيش الي جابك مره ثانيه خخخخخخ قلت له يا دكتور الله يرضى عليك - أحاول أني أكسب وده - أبغى أسوي عملية التدبيس قال لا ماراح أعمل لك أية عملية أبداً .... وانا أحاول فيه وهو مايرد علي " بيني وبينكم كان ودي أمسكه وأضربه " لكن في مثل بالمصري يقول إذا كان لك حاجه عند الكلب قوله يا سيدي -كرم الله القراء- ليس تشبيه الدكتور بالكلب ولكن لتبيين المعنى ..

المهم بعد ماخلص الدكتور من كتابته قلت له طيب وش راح تسوي الحين أنا ما اقدر على الرجيم والله شوي وكنت راح أبكي وشكله رحمني بعد ما سمع كلامي وقال أنا لازم أعلمك كيف تسيطر على جوعك!!! " والله قويه "خخخخخخ يعني وشلون يا دكتور؟؟؟ قال أنا بحولك على أخصائي نفسي!! وتغذية!! والوعد معاك بعد ما تنتهي من زيارة للدكاترة الي محولك عليهم .المهم أنا طلعت من عنده متحطم جداً جدأً و يأست أني أنحف وصرت ابلع وآكل و لاكأنني سمين إلى أن حدث .....

فاصل ونواصل

أمزح راح أكمل القصة غداً إن شاء الله

خخخخخخخخ

عودة الجوع مرة أخرة !!!

بسم الله الرحمن الرحيم

اليوم السبت الموافق 22/8/ 1429هـ

الساعة00 : 5 عصراً بتوقيت الرياض

بعد خروجي من المستشفى وإنتقالي من مرحلة شرب السوائل وأكل اللين فقط .. إلى الأكل بشكل طبيعي مرة أخرى

بداء الجو يرجع الي شيئاً فشيئاً لدرجة أنني كنت أغصب نفسي على الأكل لدرجة أنه كان يحدث لي إنسداد في مكان الربط و لا أستطيع التنفس إلا بشق الإنفس وكان الأهل يكرهون أنهم يأكلون معي بسبب الحالة التي تمر علي أثناء الأكل المهم ومرت الأيام ودخلت نادي وكان وزني وقتها ثابت ما زاد ولا نقص 112 كيلو وبعد مادخلت نادي بدائت أتمرن وأجري على السير و نقص و زني في خلال أسبوعين 2 كيلو فقط!!!

المهم أنني زهقت من النادي لئن وزني كان ثابت لا يزيد ولا ينقص رجعت للدكتور وقلت له يا دكتور أنا ما أنقص عمل لي أشعة وقال أن الربط على آخر شي يعني ما أقدر أضوق أكثر من كذا ولا تصير ما تقدر أنك تشرب الموية .

المهم أنا طلعت من عيادته ومرة الأسابيع والشهور وصار أكل يزاد شيئاً فشيئاً لدرجه انني لم أعد أشعر بوجود الحلقة على معدتي !!!

وزني أصبح يزداد شيئاً فشيئأ لدرجه أن كل الي يشوفوني يقولون انت شكلك عملت عملية فتح للمعدة ...

و أستأذنكم أكمل القصة بعدين لئنني ما أفطرت ولا تغديت لا أقدر أفكر أبداً

بعد خروجي من المستشفى !!

بسم الله الرحمن الرحيم

الجمعة الموافق 21/8/1429هـ
الساعة 5:00 مساءاً بتوقيت الرياض

قبل ما أكمل قصة الأمس خلوني أحكي عن موقف حصل معاي بالأمس ووقتها أنا كنت طفشان جداً جداً والوضع جداً خطير ينذر بأنني قد أترك الرجيم في أي وقت المهم قلت في نفسي خلني أمشي شوي في الممشى وفعلاً رحت للمشى وبدئت بمشي خفيف إلى أن جتني فكره وقلت ليه يا سمين كول ما تركض- أجري-!! وفعلاً تحمست وركضت وكنت مع كل خطوه أحس أني مثل الفراشة أطير !*_*! صدقوني الي كان يطير الشحوم خخخخخخ المهم في النهاية تعبت وركبي صارت توجعني وأصابع رجولي تنفخت ورجعت البيت وأنا تعابان وجايع جداً جداً جدأ - أوكي فهمنا أنك جايع - ورحت لم المطبخ - أكمل القصة في وقت لاحق خخخخخخخ .

أمزح أكلت سلطه وشبعت
الان أكمل قصتي بعد خروجي من المستشفى .
أنا بعد ما رحت للدكتور وحاول أنه يقعني أني أسويي رجيم وأنا رفضت وأقترح علي عملية ربط المعدة وفعلاً عملت العملية وطلعت من المستشفى نسيت أقولكم قبل ما أسوي العمليلة الدكتور قال لي شوف يا سمين كول تراك بعد العملية راح تجلس مدة شهر ما تاكل إلا سوائل أبداً وأنا كنت ماني معطي أي أهمية لهذا الكلام ... المهم بعد ما طلعت المستشفىو رحت للبيت كنت في أول يومين ما أشتهي الموية أبداً وإذا شربت الموية ما أكمل ربع الكاس وبالغصب كمان!! لئن الدكتور كان محذرني أنه ممكن يصيبني جفاف بسبب الربط - أي هين - المهم بعد هذا اليومين بديت أشرب شوربة وأكل جريش و الاكل اللين فقط ،المهم أستمريت على هذا النظام مدت إسبوعين إلى أن التأمت الجروح في جسمي وبدأت أتعود على الربط وبداء الجوع يداعب بطني مره ثانيه!! وأنا صرت كل شوي أتصل على الدكتور يا دكتور متى آكل يا دكتور أنا طفشت وهو رافض وكنت شوي وراح أبكي لئني أبغى آآآآآآآآآآآآآآآكل مع أنه كان معطيني حبوب تسد الشهية لكنها ما أثرت فيني أبداً .

أستمريت مدة أسبوع وأنا أزعجه بالإتصالات - والله أني رحمته من كثرت إزعاجي له - وجاء الأسبوع الرابع وكلمت الدكتور وقبل ما افتح فمي قال روح كل مثل ما تبي !!!! أنا بيني وبينكم أستحيت لكن وش أسوي الجوع كافر . وأتذكر بعدها أني طلبت من مطعم هرفي وقلت لهنم يوصلون الطلب لي وبعد ماوصلو الطلب بوعد أول لقمة حدث لي إنسداد في مكان الربط ولا قدرت أنتفس وصرت آحاول أشرب موية بكثره إلى أن رجعت وراح الإنسداد المهم أني ما أخطت درس من أول تجربه لي

تكملة باقي القصة غداً إن شاء الله

باااااااااااااااااي

بدايتي مع السمنة!!

بسم الله الرحمن الرحيم

اليوم الخميس الموافق 20/8/1429هـ

الساعة 2:00ظهراً بتوقيت الرياض

خلوني في البداية أحكي قصتي مع السمنة و الرجيم أنا قبل سبع سنين كنت أعاني من سمنة خفيفه يعني مثل مايقولون المصريين "كلبوزه" كان وزني وقتها تقريباً 103كيلو وطولي 166 وكنت وقتها تقريباً مقتنع بوزني لئني ماكنت أعاني من اي مشكله لكن مع مرور الوقت وصل وزني 108وبديت أفكر وشلون أنحف و عقدت جلسة مع الأهل لبحث المشكلة _ مجلس الامن الدولي على غفله - المهم أنني أتفقت مع اختي لئنها كانت تعاني قليلاً من الوزن أننا نبداء الرجيم مع بعض وفعلاً بدئنا وفي اليوم الثاني فقط إكتشفت إنها ضحكت على أو على نفسها وما بدات بالرجيم!!! وانا طبعاً أبحث عن أي مخرج أو أي حجة أتحجج بها علشان أقدر أترك الرجيم لئني كنت طفشان بالحييييييييل منه خخخخخخخ .

المهم بعدها عقدت العزم أني أبداء الرجيم دون مشاركة مع أحد وفعلاً أستمريت يومين فقط -ماهو أسبوعين أوشهرين يومين فقط - فهمنا يومين خخخ- المهم إلى أن صحيت في اليوم الثالث من النوم وكان الوقت الظهر تقريباً لقيت الوالده مجهزها الغداء !*_*! وأنا جايع لئني ما تعشيت! وراسي يعورني من الجوع! صار في حوار بيني وبين نفسي! أكل ما أكل إلى أن حسمت الوالدة الحوار بيني وبين نفسي وقالت تعال تغدى معي وأنا من باب بر الوالدين ^_^ أنقضيت على الصحن ونسيت الرجيم .

المهم مرت الايام ووصل وزني 112 تقريباً وفكرت مره ثانيه بسمنتي وقررت أني أروح لدكتور علشان أشوف حالتي المهم حاول الدكتور أنه يقنعني بالرجيم وأنا ما أعطي أي مجال له إنه يقنعني به وفي النهايه أقترح علي أن أعمل عملية ربط للمعدة ، وفعلاً سويت العملية وطلعت من المستشفى وهنا راح أحكي معكم بدايتي مع معاناتي الثانية .

التكملة غداً إن شا ءالله

بداية المدونة

بسم الله الرحمن الرحيم

في هده المدونة راح أحكي بإذن الله عن أحداث وقصصي اليومية مع السمنة ورغبتي في أني أكون رشيق مثل أخوي راكان -راح أحكيلكم قصته بعدين- طبعاً منها ما راح يكون مضحك ومنها الي يكون مبكي طبعاً لا تفسرون المعنى مثل ماهو يعني مثل المثل الي يقول شر البلية مايضحك! ..... المهم ماني مطول عليكم ولنتابع !*_*! فلم على غفله ^_^ .